Türkiyə sərhədləri açacaq?

 

Bir zamanlar bir xəbər hamımızı sarsıtmışdı – Türkiyə Ermənistanla sərhədi açacaq. Bir müddət bu xəbər gündəmdə olsa da, Azərbaycan tərəfinin sərt reaksiyası Türkiyəni bir az ayıltdı. Axırda Türkiyənin baş naziri Rəcəb Tayyip Ərdoğan çıxış etti ki, yox Ermənistan Qarabağı Azərbaycana qaytarmasa sərhədlərin açılması haqqında söhbət belə gedə bilməz. Hə, düşündük ki, qardaş, dost ölkə həqiqətən dostluğunu göstərdi. Amma deyəsən Türkiyə hökuməti verdiyi sözü gündən-günə unutmağa başladı. Bizi məyus edən bu xəbər yenə gündəmə gəldi və hətta daha da ağır şəkildə protokol belə imzalandı. Yəni doğurdanmı Türkiyə Azərbaycanı unudub Ermənistanla sərhədi açacaq? Tək bir o qalıb ki, Türkiyənin milli məclisi protokolu qəbul etsin. Bəs qəbul olunsa onda necə? Hər halda həm də məlumat verilir ki, bu bir siyasi oyundur və Türkiyə sərhədləri açmayacaq. Buna inanıb, inanmayacağımızı bilmək mümkün deyil, bunu zaman göstərəcək.

Son günlər isə gündəmdə yenə iki xəbər oldu – Hadisə və Sami Yusufla bağlı. Biri qardaş dövlətin müğənnisi, digəri isə Azərbaycan əsilli müğənni Sami Yusuf.

Hadisə Açıqgöz – Azərbaycanda mahnıları dillər əzbəri olan, Eurovision 2009-da Azərbaycanın maksimum xal verdiyi bu xanım Türkiyə ilə Ermənistanın sərhədlərinin açılmasının tərəfdarıdır. Hətta Hadisə xanım  “barış mələyi” belə olmaq istəyir. Bu kifayət etmir Hadisə üçün, İnqa və Anuş bacıları ilə birgə konsert vermək istəyir, bunun üçün hətta 14 oktyabr tarixini belə boş saxlayır. Belə görünür ki, onun üçün  qardaş ölkənin ağrı-acısı, başına gətirilən müsibətlər bir heçdir. Azərbaycana gələndə deyirdi ki, Eurovision2009 yarışmasındakı uğuruna görə Azərbaycana borcludur. Amma deyəsən bu sözünü də unudur. Azərbaycana gələndə bu dövlətə, azərbaycanlılara çox böyük sevgisi olduğunu deyirdi. Görünür Hadisənin Azərbaycana olan sevgisi konsert verib, pul yığıb öz ölkəsinə qayıdana qədər davam edib. Bu məlumatdan sonra Hadisənin Azərbaycandakı konsertini təşkil edən Nahid Emiloğlu bildirdi ki, bir də heç vaxt Azərbaycanda onun konsertini təşkil etməyəcək.

Digər müğənni isə Azərbaycanda hər kəsin qəlbində özünə yer tapan Azərbaycan əsilli Sami Yusuf. Bu müğənni də müsahibələrində deyir ki: “ermənilərlə aramıza heç bir fərq yoxdur. Eurovision 2009-da ermənilərin çıxışını azərbaycanlı təmsilçilərin ifasından çox bəyəndim və onlara dəstək oldum”. Görəsən Sami Yusufun məlumatı varmı ki, bəyəndiyi erməni təmsilçilərinin oxuduğu Azərbaycandan oğurladıqları mahnı idi. Təbii, buna heç kim təəccüblənmədi, axı oğru deyiləndə ağla ilk gələn ermənilər olur. Və yaxşı olardı Sami Yusuf tarixi unutmazdı, ermənilərin Azərbaycana qarşı elədiklərini yadına salardı. Ən azı ona görə ki, o da Azərbaycan əsillidir.

Bütün bunlar bizi təəssüfləndirir, amma daha yaxşı düşünməyimizə səbəb olurmu görəsən? Bu qədər ürəyiaçıq olmaq bizə nə qazandırıb. Xarici bir müğənni gələn kimi ona elə münasibət göstəririk ki, ömür boyu Azərbaycandan əl çəkmək istəmir. Axırda da gedib düşmənlərimizi özünə dost hesab edir. Elə Azərbaycanı geri salan bu ürəyiaçıqlığı deyilmi? 200.000 km² ərazidən 86.6 min km² əraziyə qədər azaldıq, deyəsən bu ürəyiaçıqlıq hələ bizə çox baha başa gələcək.

Türkiyə Ermənistanla sərhədi açsa ola bilsin ki, nə isə qazanacaq. Amma yaxşı olardı Türkiyə düşünərdi ki, itirəcəyi qazanacağından çox olacaq – Azərbaycan kimi qardaş ölkəni itirəcək. Və heç vaxt münasibətlər əvvəlki kimi olmayacaq.