Hind kinosi ve hakimiyyetin ssenarisi ! 2 ay həbs

Bir hind kinosu yadıma düşdü. Çoxunuz bəlkə uşaq vaxtı baxmısınız. Varlı bir hind kişisi fağır hind qadınını zorlayır. Məhkəmə olur. Məhkəmədə kişi çıxış edərək  hadisəni təsvir edir. Olanları əksinə danışmağa başlayır. Kinoda kişinin sözləri canlandırılır. Hind kişisi deyir:

” Mən istəmirdim. Onun mənə çoxdan gözü düşmüşdü. Mənim isə ondan xoşum gəlmirdi. Həmin gün o, mənə ilişməyə başladı. Mən isə dedim: “Xahiş edirəm eləmə, lazım deyil. Yox, eləmə, istəmirəm”.  O isə mənə fikir vermirdi, məni zorladı.”

Bu səhnələrdə nə qədər gülmüşdüm. Qadın kişi kimi, kişi isə qadın kimi davranırdı. Təsəvvürünüzə gətirə bildinizsə, əminəm, siz də gülürsünüz. “Kor kor gör gör” – deyə bir şey var.  Qadın silahlı olmayıb, kişi də dünya gözəli deyil, qadının heç fiziki gücü də çatmır ki, kişini zorlasın.  Yer üzündə elə insan tapılmaz ki, bu məsələyə inansın. Amma o kinoda hind məhkəməsi ona inanır.

Bax, hakimiyyət də bu hind kinosundakı kimi bir ssenari hazırlayıb.  İki qolu zorbanı salırlar uşaqların dalına, onlar da gəlib otururlar restoranda.  Söz atırlar cavab  gəlmir, yaxınlaşıb bir də ilişirlər. Cavab kobud olmasa da, kələni atır, sonra o birisinə (?).  Yerə uzanan kimi hər ikisini əzişdirirlər. Yoxa çıxırlar. Zərərçəkənlər 9-cu şöbəyə şikayətə gedir. Onları ordan 39-a göndərirlər. Zərərçəkmişlər 39-da olanda 9-cu şöbə necə olursa zorakıları tutur.

KOR KOR, GÖR GÖR

Hakimiyyətin ssenarisi

İki  mədəni insan gəlir restaranda mədəni istirahətə.( İkisi də məcburi köçkün, yataqxanada yaşayırlar özü də. Halbuki bir çoxumuz o bahalı restorana indiyə qədər getməmişik). Baxıb görürlər ki, mədəniyyətsiz, agzının danışığını bilməyən 7-8 gənc hay-küy salıb hamını narahat edirlər. İdmançılar cəmiyyət arasına çıxmamış gənclərə yaxınlaşıb mədəni şəkildə deyirlər: “Üzr istəyirəm, siz çox yüksəkdən danşırsınız. Narahat oluruq, zəhmət olmasa yavaş danışın”. Bunun qarşılığında cəmiyyətin utanc nümunəsi olan bu gənclər mədəni istirahət edən iki idmançı gənci söyməyə başlayır, idmançılara kəllə yumruq atırlar. Dildən qoçaq olan bu gənclər fiziki zəif olduqları üçün vurduqları hər zərbədən öz başları, bədənləri, burunları əzilməyə başlayır.  İdmançılar restorandan çıxıb polis bölməsinə şikayət edirlər. Asayış qoruqçuları isə qısa müddətdə zorakıları yaxalayırlar.

KOR KOR, GÖR GÖR

Ay başına dönüm, necə olur ki, Adnan və Emin o iki idmançını döyə bilib ??  Axı, onlar həm Adnandan, həm də Emindən bədəncə və güc baxımında xeyli üstün olublar. Bədənləri əzələli olub. Yaxşı, bəs 9-cu bölmə necə tutub bunları? Şəkillərimi var idi ?

Hind kinosunda güldüyüm Hind Məhkəməsi real oldu. Bizim Milli Azərbaycan Məhkəməsi Emin və Adnana 2 aylıq həbs cəzası verib.

Hakimiyyətə sözüm var.  Zəhmət olmasa, gələn səfər daha keyfiyyətli ssenaristlə işləyin. Hollywooda müraciət edin, kömək edərlər. Qoy neft pulundan bir iki yüz min də bura xərclənsin. Dədə pulu deyil ki, dövlətdən gedir də onsuz da!