Qızıl balığını axtaranlar

Burada yer tutmaq üçün yuxularına haram qataraq gecə saat 3-dən gəlirlər. 300 nəfər arasında yer tutmaq elə də asan iş deyil. Bunu özləri də etiraf edirlər. Söhbət Dənizkənari parkda dənizin içərisinə (köhnə “Sadko” restoranına tərəf) gedən yolda balıq tutan balıqçılardan gedir. Deyilənə görə, könlü balıq istəyənin quyruğu suda gərək. Balıqçıların da könlünə balıq düşəndə və ya boş vaxtlarında tilovlarıni qoltuqlarına vurub gəlirlər bura. Qismət Allahdandır deyib, saatlarla öz balıqlarının yolunu gözləyirlər. Onların çoxu peşəkar deyil, həvəskar balıqçılardır.
Dediklərinə görə, tutduqları balıqları yalnız özləri üçün evə aparırlar. Amma arada tutduqları balıqları satdıqlarını danmırlar. Balığın bol olduğu vaxtlarda, martın 15-dən sentyabra qədər çörəkləri “balıqdan çıxır”. Bəzən günə 4-5 kq, bəxti gətirənlər isə 8-10 kq-a qədər balıq tuta bilir. Qışda isə balıqlar sahildən xeyli kənarda, dənizin daha dərin hissələrində olurlar. Balıqçılar küləkli havanı çox sevirlər. Əsas da Şimal küləyi olan zaman. Çünki bu vaxt sahildə balıq daha çox olur. Amma elə günlər var ki, saatlarla gözləmələrinə baxmayaraq, 1 dənə də olsun balıq tuta bilmirlər.
Tor balığından balıq olmaz
Burada balıqları həyət və dəniz qurdlarıyla aldadırlar. Əvvəlcə həyət qurdlarını qarmağa keçirir, suya ataraq qızıl balıqlarını gözləyirlər. Tor balığını bəyənməyən Rauf dayı “Tor balığından balıq olmaz. Çünki onu tutarkən əzilir” deyir. Bəzən tilovuna düşən balıqların gözəlliyinə valeh olub onları yenidən dənizə tullayır. 1 dəfə isə tilovuna daha böyük balıq düşür. Lakin Rauf dayı onu ələ keçirə bilmir. O, tilovu qıraraq dənizə qayıdır. “Bir də görürsən ki, əziyyətlə 3-4 balıq tutursan, onlar da sürüşüb düşür dənizə, qalırsan baxa-baxa”.
Mindim Bakıda, düşdüm Sumqayıtda
Yeddi yaşından balıq tutan Həmid Koxayev artıq 20 ildir ki, bu işindən əl çəkmir. Bakıda qayığa minib balıq tutmaq istəyən Həmidi qəflətən külək yaxalayır. Küləklə çarpışıb, dalğalarla döyüşür. Nəhayət, bu mübarizədən qalib çıxaraq Sumqayıtda qayığını sahilə çıxara bilir.
Balıqçılar öz sirlərini heç də bölüşməyi sevmirlər. Amma bizə bəzi sirrləri dedilər. Məsələn, qarmağı atarkən ehtiyatlı olmaq lazımdır. Var güclə atmağa çalışsaz suya düşmək olar. Həm də atarkən tilovu çox yuxarı qaldırmaq olmaz. Çünki balıq bir az dərində olur. Tilovu dərinlik və uzunluq daxil olmaqla 10 metrə qədər atmaq lazımdır. Balıqçılar deyirlər ki, dəniz balıqları yarım saat susuz qala bilər. Amma dabanbalığını, hətta buzxanada saxlasan belə, bir həftədən sonra dirilmək ehtimalı var. Dənizə işıq düşərkən o tərəf, bu tərəfə tullanan balıqlar isə karas adlı balıqlardır.