Bluetoothlaşdırılmışlar !

Cəmiyyətimiz inkişaf edir. Əsasən də texnologiya sahəsində. Texnologiyanın mobil bölməsində. Mobil texnologiyanın da əsasən bluetooth  sahəsində. Cəmiyyətimiz bluetoothlaşır.  Hər bir azərbaycanlı telefon alanda  çalışır  onun bluetoothu olsun. Halbuki bu mobil telefonların bir çox  müsbət xüsusiyyətləri var. İnternet, kitab  proqramları, müxtəlif formatlı mətnləri oxudan proqramlar. Bu proqramlarla  maraqlanan çox azdır.

Yəqin ki, bir  çoxlarınız metrodan istifadə edirsiz. Mən də həmçinin.  Metro bluetoothlaşmışlar üçün əla məkandır. Metroya girən kimi telefonlar işə düşür. Kitab oxuma proqramları  yox, sırf  bluetooth əməliyyatı başlayır. Gözlərə işıq  gəlir. Bəziləri çəkinmədən telefonu əlində tutub bluetoothlaşmış əks  cinsini axtarmağa başlasa da, çoxları nədənsə gödəkcəsinin altında və yaxud  yoldaşının kürəyinə qısılıb axtarışa  başlayır. Siz bu an onların gözlərinə baxasınız. Gözlər telefonun ekranına baxsa da, eyni zamanda  uzaqlara  baxır. Orada  tapacağı insanla olan xəyallar  canlanır. Amma  bu xəyallar rəngarəng deyil. Qaranlıqdır. Orada  kol dibi, parkların insan  olmayan yerləri, qaranlıq küçələr və dalanlar canlanır. Məqsəd birdir. Bluetoothlaşmış insanlardır. Qəlbləri də bluetoothlaşıb. Bluetooth kimi sönüb yanır. Ehtirasları da. Məqsəd alışan bu ehtirası söndürməyə əks cins tapmaqdır. Ehtiras  söndü, həmcinsindən doydusa, qəlbin qapısı da bağlanır. Bluetooth kimi.
Eh cavanlar? ? ?  Yox eh cavanlar yox! Eh azərbaycanlılar ! Çünki bluetoothlaşmışlar  təkcə gənclər deyil. Ətrafınıza baxın, bluetoothlaşmışların yaşı  müxtəlifdir. Ailəli, böyük uşaq sahibləri də bluetooth  ovuna çıxır. Yaşlı insanların da  bluetoothlu telefonu olsa, bəlkə onlar da  bluetoothlaşardı.
Nə üçün bluetoothlaşmışlar maariflənmişlər olmur. Nə üçün metroya insan çox olan yerə girən kimi telefonlar  çıxır, kitab, qəzet, jurnal çıxmır? Bluetooth  bizi manqurtlaşdırdı ???
Telefonları yığışdıraq ? ? ? Qadağa qoyaq ki, ölkəyə bluetoothlu telefon gətirilməsin? Yox ! Bu bluetoothun cəmiyyətimizə verdiyi eybəcərlik deyil, bu bizim insanların  bluetooth adına  gətirdiyi eybəcərlikdir.